Posted in Legislative Analysis, Political Institutions on Jan 23, 2020

ဥပဒေကြမ်းကို ၂၇.၁၂.၂၀၁၉ ရက်စွဲနဲ့ ပြည်ထောင်စုလွှတ်တော်ရဲ့ အင်တာနက်စာမျက်နှာပေါ်မှာ ဖော်ပြထားပါတယ်။

လက်ရှိအခြေအနေ (၂၃.၁.၂၀၂၀) - လွှတ်တော်တစ်ရပ်ရပ်မှာ ဆွေးနွေးဖို့ ဆောင်ရွက်နေဆဲ။


ဥပဒေကြမ်း

ဥပဒေကြမ်းထဲမှာ နိုင်ငံခြားသုံးငွေတွေနဲ့ ရွှေအပါအဝင် လက်ဝတ်ရတနာတွေ ဝယ်ယူရောင်းဝယ်တာ၊ ကိုင်တွယ်သုံးစွဲတာတွေနဲ့ ပတ်သက်တဲ့ ပြဋ္ဌာန်းချက်၊ လိုက်နာရမယ့် စည်းမျဉ်းစည်းကမ်းတွေ၊ နဲ့ သာမန်စာရင်း ဒါမှမဟုတ် ငွေလုံးငွေရင်းစာရင်းပိုင်းဆိုင်ရာ လွှဲပြောင်းပေးချေမှုတွေ စတာတွေကို ထည့်သွင်းပြဋ္ဌာန်းထားပါတယ်။

အကျဉ်းချုပ်

  • ရည်ရွယ်ချက်အနေနဲ့ နိုင်ငံခြားသုံးငွေစီမံခန့်ခွဲမှု ကောင်းမွန်စေရေး၊ လူမှုစီးပွားဖွံ့ဖြိုးတိုးတက်ရေးနဲ့ ပြည်ပစီးပွားဆက်သွယ်ရေးနဲ့ ပူးပေါင်းဆောင်ရွက်ရေး ကျယ်ပြန့်လာစေရေးအတွက်လို့ ဆိုထားပါတယ်။

  • နိုင်ငံခြားသုံးငွေစီမံခန့်ခွဲမှုနဲ့ ပတ်သက်ရင် ဗဟိုဘဏ်က ဥပဒေပါပြဋ္ဌာန်းတွေနဲ့အညီ မူဝါဒတွေ ချမှတ်ဆောင်ရွက်ရမှာ ဖြစ်ပြီး ဈေးကွက်ငွေလဲလှယ်နှုန်းကို အခြေခံတဲ့ ငွေလဲလှယ်နှုန်းကို နေ့စဉ်ကြေညာရမှာ ဖြစ်ပါတယ်။

  • ပြည်ထောင်စုအစိုးရအဖွဲ့ဟာ နိုင်ငံခြားသုံးငွေလုပ်ငန်းနဲ့ ပတ်သက်ပြီး သုံးလထက်မပိုတဲ့ အရေးပေါ်ကာလ သတ်မှတ်နိုင်ပြီး လိုအပ်ရင် တစ်ကြိမ်ကို သုံးလထက်မပိုစေဘဲ ထပ်မံ သတ်မှတ်နိုင်ပါတယ်။ အရေးပေါ်ကာလ သတ်မှတ်ထားရင် ဗဟိုဘဏ်ဟာ နိုင်ငံခြားသုံးငွေလုပ်ငန်းလုပ်ကိုင်ခွင့်လိုင်စင်တွေကို ယာယီကန့်သတ်နိုင်ပါတယ်။

  • နိုင်ငံခြားသုံးငွေလုပ်ငန်း လုပ်ကိုင်ခွင့်လိုင်စင်ရရှိသူဆိုတဲ့ စကားရပ်ရဲ့ အဓိပ္ပာယ်အရ နိုင်ငံခြားငွေဝယ်ယူရောင်းချ လဲလှယ်ပေးခွင့် လိုင်စင်ရရှိသူ၊ နိုင်ငံခြားသုံးငွေ ရောင်းဝယ်ဖောက်ကားတဲ့ လိုင်စင်ရှိသူတွေအပါအဝင် ဗဟိုဘဏ်က အခါအားလျော်စွာ သတ်မှတ်ထားတဲ့ လိုင်စင်တစ်မျိုးမျိုး ရရှိသူတွေ ပါဝင်ပါတယ်။

  • နိုင်ငံတော်အတွင်းမှာ ကုန်စည်၊ ဝန်ဆောင်မှု ဒါမှမဟုတ် အခြေပစ္စည်းရောင်းချခြင်း၊ လွှဲပြောင်းခြင်း၊ ငှားရမ်းခြင်းတွေအတွက် နိုင်ငံခြားသုံးငွေနဲ့ ဈေးနှုန်းသတ်မှတ်တာတွေ၊ ပေးချေတာတွေ၊ လက်ခံတာတွေကို ဗဟိုဘဏ်ရဲ့ စည်းမျဉ်း၊ ညွှန်ကြားချက်တွေနဲ့ အညီ ဆောင်ရွက်ရမှာ ဖြစ်ပါတယ်။

  • နိုင်ငံတော်နဲ့ ပြည်ပနိုင်ငံတွေအကြားမှာ နိုင်ငံခြားငွေ ငွေသား၊ပေးချေမှုစာချုပ်စာတမ်းနဲ့ ငွေချေးသက်သေခံ လက်မှတ်တွေ လက်ရောက်လွှဲပြောင်းခြင်းကို ဗဟိုဘဏ်ရဲ့ စည်းမျဉ်း၊ ညွှန်ကြားချက်တွေနဲ့အညီ ဆောင်ရွက်ရမှာ ဖြစ်ပါတယ်။ ဒီလို လက်ရောက်လွှဲပြောင်းခြင်းကလွဲရင် နိုင်ငံခြားသုံးငွေနဲ့ ပေးချေမှု၊ လွှဲပြောင်းမှုတွေကို လုပ်ငန်းလုပ်ကိုင်ခွင့်လိုင်စင် ရရှိထားသူကသာ ဗဟိုဘဏ်ရဲ့ စည်းမျဉ်း၊ ညွှန်ကြားချက်နဲ့အညီ ဆောင်ရွက်ခွင့် ရှိပါတယ်။ ကုန်သွယ်မှုဆိုင်ရာ ပေးချေမှုနဲ့ လွှဲပြောင်းမှုတွေကို နိုင်ငံခြားသုံးငွေ ရောင်းဝယ်ဖောက်ကားတဲ့ လုပ်ငန်းလိုင်စင်ရှိတဲ့ ဘဏ်ကတဆင့်သာ ဆောင်ရွက်ရမှာ ဖြစ်ပါတယ်။

  • ဗဟိုဘဏ်ဟာ နိုင်ငံခြားသုံးငွေလုပ်ငန်းလိုင်စင်တွေ လျှောက်ထားလာရင် လိုင်စင်ထုတ်ပေးခြင်း၊ ငြင်းပယ်ခြင်းတွေ ပြုလုပ်နိုင်ပြီး လိုင်စင်ရုပ်သိမ်းခြင်းကိုလည်း ဆောင်ရွက်နိုင်ပါတယ်။ ဥပဒေပါပြဋ္ဌာန်းချက်တွေကို ဖောက်ဖျက်တဲ့ လုပ်ငန်းလိုင်စင်ရရှိသူတွေကို ဗဟိုဘဏ်က စီမံခန့်ခွဲရေးနည်းလမ်းတွေနဲ့ အရေးယူနိုင်ပြီး အရေးယူခံရသူဟာ ဗဟိုဘဏ်ဒါရိုက်တာဘုတ်အဖွဲ့ကို အယူခံဝင်နိုင်ကာ ဘုတ်အဖွဲ့ရဲ့ အဆုံးအဖြတ်က အပြီးအပြတ် ဖြစ်ပါတယ်။

  • ဥပဒေကြမ်းထဲမှာ တားမြစ်ထားတဲ့ ပြစ်မှုတွေရှိပြီး ပြစ်ဒဏ်တွေလည်း သတ်မှတ်ထားပါတယ်။ ပြစ်မှုတွေဟာ ရဲအရေးပိုင်တဲ့ ပြစ်မှုတွေဖြစ်ပြီး တရားစွဲဆိုမယ်ဆိုရင်တော့ ဗဟိုဘဏ်ရဲ့ ခွင့်ပြုချက်ကို ရယူရမှာ ဖြစ်ပါတယ်။

ဆက်စပ်ဥပဒေများ

မြန်မာနိုင်ငံတော် ဗဟိုဘဏ် ဥပဒေ (၂၀၁၃)

ငွေချေးသက်သေခံလက်မှတ်များ လဲလှယ်ရောင်းဝယ်ရေး ဥပဒေ (၂၀၁၃)

ငွေကြေးခဝါချမှုတိုက်ဖျက်ရေး ဥပဒေ (၂၀၁၄)

အကြမ်းဖက်မှုတိုက်ဖျက်ရေး ဥပဒေ (၂၀၁၄)

မြန်မာနိုင်ငံရင်းနှီးမြှုပ်နှံမှု ဥပဒေ (၂၀၁၆)

လင့်ခ်များ

ဥပဒေကြမ်း

World Gold Council

ဆက်သွယ်ရန်

မိုးအောင်၊ အာနန္ဒာ၊ moeaung@theananda.org